السلام عليكم

انا مش همل ولا اسكت الا لما يكون فى حل جذرى من الحكومه

يا جماعه للمره المليون باقى اسابيع على العام الدراسى ووباء الانفلونزا خطر يهدد ابنائنا

اعلنت الحكومه تاجيل الدراسه لمده اسبوع

يا سلام وهو الاسبوع ده هو اللى يقلل الاصابات

واعلنت برضو ان فى مصر ومصر بس الوضع تحت السيطره مش لاسمح الله كل يوم يكتشفوا بالمئات

وذكرت الصحف المصريه انه فى بدايه هذا الموسم موسم الخريف من المتوقع اصابه ربع سكان اليابان

تخيل ربع سكان اليابان مهددين صراحه اما فى مصر فان الوضع تحت السيطره

بالرغم من الكثافه السكانيه والعشوائيه فى التعامل والاحتكاكات اليوميه والجهل بما نواجهه من خطر بس الوضع فى نظر المسئولين تحت السيطره

نرجع تانى للمدارس

يا جماعه انا خايف على اولادى

اولادى واصدقاءهم المقربين مناعتهم ضعيفه

وفى فصل الخريف والربيع من اول المصابين بالانفلونزا

اعمل ايه

صوتى اتنبح

قعدو الطلبه فى البيوت

يذاكروا فى البيوت

يروحوا بس امتحانات اخر العام

يا باشمهندس الغى التيرم

ما طول عمرنا عايشين من غير تيرم

ثم اصلا مفيش داعى للمدارس اولا المدارس عندنا حالها زى حال كل المصالح الحكوميه اللى فى مصر

دائما نتفاجا ان بكره اول الاسبوع

بمعنى ان المدراس كلنا عارفين انها بتدخل فى 20 سبتمبر من كل عام

بس المدارس مع الاسف بتكون اخر من يعلم ليه؟؟؟؟؟

ااقولك ليه لان الكتب المدرسيه سيادتك بتنزل بعد الدراسه بشهر

ونتفاجأ برضو ان المناهج اتغيرت قبل اسبوع من بدايه العام الدراسى والتيرم مدته صغيره والمطلوب انك تنتظر نزول الكتب الاساسيه بتاعه المدرسه علشان بناء عليها تشترى الكتب الخارجيه وفى الحالتين مش بتنزل قبل شهر

من بدايه العام الدراسى

تبقى فايده المدرسه ايه والنبى

والنبى رفقا بقره اعييننا

قعدوا الطلبه فى البيوت

مش عايز تلغى الموسم الدراسى ولا تاجله يبقى اتقى الشبهات

امسكوا العصايه من النص

سيبوا الطلبه يذاكروا فى بيوتها وبعدين امتحنهم اخر العام

امال فين خططكم البديله هى كل اللى قدرت عليه يا سيدى وزير التعليم المبجل انك اخرتها اسبوع ده يرضى مين؟؟؟؟