شوية نكت ع الماشي

مرة ولد غبى مش عايز يروح المدرسة ابوه قاله ليه مش عايز تروح المدرسة ؟ الولد قاله اصل يا بابا المدرس بيقولى انا غبى ومبفهمش قاله طيب انا هروح معاك المدرسة وهشوف المدرس المهم ان ابو الولد راح المدرسة قال للمدرس انت ليه بتقول على ابنى غبى ومبيفهمش المدرس قاله انا هثبتلك ان ابنك غبى راح المدرس قال للولد روح شوفنى كده في مكتب الناظر وتعالى راح الولد وجيه قاله حضرتك مش موجود فى مكتب الناظر راح ابو الولد قاله يا غبي ملقتهوش فى مكتب الناظر طيب انزل شوفه فى الحوش



بلدياتنا سافر امريكا واصحابه نصحوه ياخد معاه 3 زلع مش علشان الاكل الامريكانى مش حلال بس نبهوه يسمى قبل ما ياكل احسن الشيطان ياكل معاه.اول شهر اكل اول زلعة بس نسى يسمي، تانى شهر برضه نسى يسمي، ثالث شهر طلع له الشيطان قال له:"ابوس ايدك سمي، صدرى اتحرق!"



مره خمس صعايده داخلين امتحان فجالهم سؤال ما هي عدد ارجل المعزه؟ كلهم قعدوا بقى يسألوا الدحيح بتاعهم مكنش بيرد عليهم بعد الامتحان بيسألوه انت مكنتش بترد ليه علينا قالهم اصل المراقب كان جنبي معرفتش اطلع المعزة



مرة واحد سعودي لقى مصباح علاء الدين دعكه طلعله الجني قاله شبيك لبيك تطلب
ايه: قاله: طلعلي كل المصريين من السعوديه فالجني قاله: ليه بس يا عم احنا
عملنالك حاجه



مره اتنيين مساطيل ماشيين على شريط القطر فواحد بيقول للتاني يآ اخي السلم ده طويل بشكل..... رد التاني عليه : اللي مضايقني ان الترابزين واطي أوي


صعيدي بيعد بالانجليزي ... وان - توو - ثري - فور - فايف -استغفر الله ? سكس.



بيقولك مرة واحد قرر يرشح نفسه رئيس الجمهورية، مسكوه بتوع أمن الدولة و قالولوا أنت عبيط ولا ايه،قالهم هو شرط؟



واحد سكران فتح التلاجه وبص للجلي ...لقاه بيرتعش :قالوه متخفش أنا هاخد عصير



كان فى فيها أربعة واحد امريكى وواحد ايطالى وواحد المانى وواحد صعيدى الطيار قال لازم تلاتة ينطوا من ال احسن تقع جه الامريكى قال احنا بتوع الشجاعة وراح ناطط وجه الالمانى قال احنا بتوع الكراتيه وراح ناطط وجه الصعيدى قال احنا بتوع الندالة وراح زاقق اللى جنبه



واحد ندل قعد لمده سنة يتحايل على حبيبته علشان تخرج معاه ولما وافقت راح قال لأبوها




واحد مسطول ماشي في البيت خبط في أمه .. قالتله ايه ما شفتنيش .. قالها لاء شفتك بس مش فاكر فين



واحد نايم جنب مراته فسمعت صوت، بتقوله قوم يا راجل فى حرامى فى الصالة، قالها يا شيخه نامى انتي جنبك سبع، قالتله يا راجل فى حرامي فى اوضة النوم قالها يا شيخه نامى انتي جنبك سبع، وبعدين قالتله يا راجل حرامى شالني وماشي قالها روحي ماتخفيش سايبة فى البيت سبع



مرة واحد غبي راح يخطب فوالد العروسة بيقولة احنا عايزين مهر عشرين الف جنية قام الغبي قالة لية دا انا قدامي واحدة على خمس آلاف وحامل



واحد بيقول لمراته ... انا النهاردة عايز رومانسية فى البيت ... راحت مراته سألت أمها : يعنى ايه رومانسية ؟؟ أمها قالت لها : مش عارفة بس احتياطي إنقعى الرز





حشاش بيقول لصاحبه: انا حلمت امبارح أننا بقينا فنانين .. أنت فنان تشكيلي ... وأنا فنان أشكيلك



مرة اتنين صعايدة بيلعبوا شطرنج الإتنين خسروا..



أحول سألوه ايه امنيتك في الحياة ؟؟ قالهم :اشوف واحد ماشي لوحده





اتنين مساطيل واحد سال التاني هو النهارده السبت و لا الاحد قاله الاتنين قاله ماشاء الله هما بقوا سوا !!



بيقوللك ثلاثه مساطيل بيحكوا مع بعض, اول واحد بيقول: انا لو معايا فلوس اشترى امريكا الجنوبيه , والتانى : قال وانا لو معايا فلوس اشترى امريكا الشماليه, فرد الثالث وقالهم : ومين قالكم ان انا هبيع



اثناء مرور مدير مستشفي الامراض العقلية علي عنابر النزلاء لقى واحد قدامه بيكتب جواب فسأله المدير: بتكتب جواب لمين، المريض قاله : بكتب جواب لنفسي، المدير: فيه حد بيكتب جواب لنفسه طيب بتقول فيه ايه، المريض قاله : سبحان الله.. واعرف منين مش لما الجواب يوصلني.



واحد سكران كان بيعاكس وحدة وحشة اوي بالليل فكان بيقول لها يا وحشة يا وحشة راحت ملتفتة له وقالت له يا سكران راح قايل لها طب انا سكران وحفوق بكرة .. . وانتي !!!



عيل صغير سأل أمة إزاى انا جيت الدنيا قالت له حطيت شوية سكر تحت السجادة لقيتك جيت ... راح الولد حاطط شوية سكر تحت السجادة... بعد يومين لقى صرصار راح قال له لو مكنتش ابنى كنت قتلتك



محشش قاعد في الإمتحان مش عارف يحل والإمتحان كله صح و غلط راح مطلع بريزه ولعب ملك وكتابة على الإمتحان خلص الإمتحان في نص ساعة وهو خارج طلع البريزة تاني وشغال ملك وكتابة صاحبه المسطول بيسأله : بتعمل ايه .. ما خلاص !! قاله سيبني ... بتأكد من الأجوبة




اتنين مساطيل بيحششوا قدام مرايا فواحد قال لتاني قوم بينا نسلم علي الاتنين اللي قدامنا دول.... و هم قايمين التاني قاله اقعد يا عم هما جايين هم ...




2مساطيل واحد فيهم بيقول لصاحبه هما الفراعنه بنو الهرم في اد ايه قاله في عشرين سنه فرد عليه يـاااه عشرين سنه دا كتير قوي قله اصلهم كل لما يروصوا حجرين المباحث تيجي تشدهم






--------------------------------------------------------------------

يارب اجعلنى عندك من خير الناس ... وعند الناس واحد من الناس ... وفى نفسي أقل من الناس

بجد شويه نكت روشين ضحكت من قلبى بقالى مدة مضحكتش كدة
الله يبارك فيك

ربنا يبارك فيك الحمد لله ان ربنا يسرنى لاسعادكم وادخال البسمه على قلوبكم شفاهكم
مشكور كتير على مرورك الغالى على قلوبينا ومجاملتك الجميلة الرقيقه
جزاك الله عنى كل خير
ومنتظرين تعليقاتك البنائه والهادفه
وموضيعك الشيقه التى عودتنا عليها و اشجنت قلوبنا باشعارك الممتعه

بارك الله فيك واسعد قلبك
الحمد لله ان ربنا سخرنى لادخل الفرحه على وجوهكم والبسمة على شفايفكم
مشكور اخى الغالى على مرورك الجميل والقيم
وررد

نكت كتير حلوة ومضحكة

فعلا نكت جميلة يا سوسو

ودى واحده من عندى على الصعايدة برضة



صعيدي قالوا له في الصين كل دقيقة ينولد واحد
قال : يسلام على التطور ياولد مش عندنا بعد 9 شهور