قصيدة اسكندرية للشاعر احمد فؤاد نجم


يا اسكندريــــــة

بحرك عجايـــــب

ياريت ينوبنى م الحب جانـــب

تحدفنى موجــــه

على صدر موجــــه

والبحر هوجـــة

والصيد مطايــــب

أغسل هدومى

وأنشر همومى

على شمسه طالعه

وأنا فيها دايب


*************

كأنى فلاح من جيش عرابى

مات ع الطوابى

وراح فى بحرك

كأنى نسمة فوق الروابى

م البحر جيّه

تغرق فى سحرك

كأنى كلمة من عقل بيرم

كأنى غنوة من قلب سيد

كأنى جُوّا المظاهرة طالب

هتف باسمك

ومات معيّد

كأنى صوت النديم

فى ليلك

بيصّحى ناسك

يشدوا حيلك

كأنى طوبة من بيت فى حارة

كأنى دمعة

فى عيون سهارى

كأنى نجمه فوق الفنارة

تهدى الحيارى

والبدر غايب


***************

يا اسكندرية

يامصراوية

على سنْ باسم

على ضحكة هالّـــه

البحر

شباك ومشربية

وانتى الأميرة

ع الدنيا طالّـــه


**********

يا اسكندرية عاشق

وبدى

ارتاح فى حضنك

والود ودّى

يكون كلامى

عربون غرامى

وبالمحبه ناخد وندى

يا اسكندرية فيكى الغلابة

ع الرزق يسعوا ولا يناموش

صبح صباحهم

رجع مساهم

وزاد شقاهم

وما ارتاحوش

ياعينى ع اللى

الزمان تعبهم

وضاع تعبهم

ومالتقوش

نزل شبكهم

فى بحر طامى

طلع شبكهم

على فاشوش

وفيكى بين البشر

ديابه

وفيكى فوق البشر

وحوش

وفيكى ناس مغرمين صبابه

لو خان زمانهم

مابيخونوش

وفيكى خمرى

سلمت أمرى

ما أقدرش اشوفه

وما اغنيلوش


**********

سمك يا بنى يا اسكندرانى

فى العشق واحد

مالكش تانى

سمك يابنى يا اسكندرانى

فى الحسن ساحر ومعجبانى


***************

سمك يا بنى

والعشق غيّه

تبدأ بنظره

تبقى ملاغيه

وكل عاشق وله بهيه

وكل شاعر وله أغانى

وانا اللى عشق الصبايا كارى

أعشق و أغنى

ما اقدرش أدارى

وأى نظرة بتجيب قرارى

وايشحال عيونك

يا الاسمرانى