اعملى كل مايرضيكى
كرهينى كمان فيكى
كرهينى فى كل مرة
اشتقت فيها ليكى
كرهينى فى كل لحظة
خفت فيها عليكى
كرهينى فى حكاويكى
كرهينى فى لياليكى
كرهينى فى كل كلمة
قلتها يوم ليكى
واسمعينى قبل ما الوقت يفوت
قبل ما الحزن يعشش
1000 بيت للعنكبوت
قبل ما ياخدنى الطوفان
ويرمينى فى بطن حوت
اسمعينى وبعدها
يمكن اموت
مشيتينى فى الشوارع
زى ما يكونلى ابن مات
ببقى سارح بس سامع
صوت كلاكس الاتوبيسات
وكأن بينى وبين الدنيا
1000 عام من السكات
وكأن بينى وبينك
1000 عام نت الاهات
ماشى فى الشوارع اتفرج عالفتارين
والاقى رجلى الشمال
تملى سابقة اليمين
اطلع من رصيف
انزل لرصيف
والجو مش باينلو
شتا والا صيف
وف عز ما انا ماشى
احس بنبض قلبى الضعيف
واسمع همس جنب منى خفيف
التفت
القاكى جنب منى
القاكى بتغنى
اقطع غناكى واقولك
غنى
ميهمكيش منى
متسأليش عنى
دة اللى زى مات من زمان
اللى زى ملوش فى دنيا الفرح
مكان
اللى زى اصله واخد عالاحزان
كنت اشوفك جايه من بعيد
قلبى يزأطط
رجلى تخبط
كلى يتلخبط
واما القاكى واحدة تانيه
ارجع واعيط
اهبد برجلى عالبيبان
واخبط
واكتب اسمك عالحيطان
واشخبط
وف عز ما انا ماشى
اسمع ادان الديك
الفجر شقشق عالبيوت
نهار جديد بيتولد
وانا الوحيد
اللى مكتوبلو يموت
انا الوحيد
اللى عشش فيه العنكبوت
ادخل من زقايق
اطلع من حوارى
مين حاسس باللى بيا
مين فيكم بيا دارى
مين حاسس بنارى
وقول لدمعتى
مابين عيونى اتدارى
ده اللى حبيتها
مهياش سألة فيك
مش هاممها حبك ليها
مش شاغلها تسأل عليك
واللى بينكم انتهى من زمان
وياريت تفوق م الوهم
وتلحق اللى جى
قبل مايحصل اللى كان
ياريت بالامكان