المسابقة الرياضية

جائزة قدرها خمسة جنيه للي يجاوب على سؤال المسابقة

طبعا ممكن حد يقوللي الجايزة مالها أي كلام كدا ليه

هاقولـله لأن السؤال سهل أوي وأي عيل صُغير يجاوبه



والآن مع المسابقة

فريق رياضي شهير جدا

أشهر فريق في الشرق الأوسط

مافازش في أي مبارة سواء محلية أو دولية

المرمى بتاعه من غير حارس مرمى ، يعني مفتوح للي عايز يشوط عليه

كل ماتش بيدخل فيه من خمسة إلى خمسين جول

وأحيانا اللاعيبه بتوعو بيكونو همه اللي مدخلين في نفسهم الأجوال

اللاعيبه بتوع الفريق فيه منهم الأخرس والأطرش والمكسح والاهبل وأبو كرش .. وغيره

الغريب إن أول ما يبدأ الماتش بتلاقي الفريق كل واحد بيجري في ناحية

يعني اللي راح يمين واللي راح شمال واللي طلع برة الملعب خالص وكدا

الفريق مالوش مدير فني يعني مالوش كبير .. اللي عايز يلعب في أي مركز بيلعب واللي مش عايز يلعب خالص بردو براحته

اسم الشهرة للفريق "لو جدع خد الكورة ياخويا" والاسم دا أطلقه عليهم الجمهور عشان محدش في الفريق بيشوط الكورة لزميله

في المؤتمر الصحفي بعد كل ماتش -بمعنى أصح بعد كل هزيمة- يقول الفريق إن سبب الهزيمة هو الجمهور

والغريب في الموضوع إن في كل ماتش الفريق بيكون قافل باب الاستاد ومابيسمحش للجمهور يطلع برة

عرفت الإجابة

؟؟؟

أظن الإجابة سهلة أوي أوي أوي

طب لو ماعرفتش حاقوللك آخر مساعدة وبكدة أكيد هتعرف

مهما حاول الجمهور لا يمكن لأي لاعب إنو يرضى يحترف برة.. ولا يمكن لأي لاعب إنو يرضى لناديه شراء أي لاعب من برة بردو

يعني اللاعيبة همه همه مابيتغيروش

وفي حالة لو واحد من اللاعيبه اتشل أو مات ، ابنه بيلعب في المركز بتاعه

هاه .. عرفت الإجابة

؟؟؟

برافووووووووووووووووو عليك

الإجابة صحيحة







فريق الخيبة العربي